Hagar yaqaan
....................................................................

Waxaan horay u soo sheegnay Ammaan iyo aflagaaddaba mid kastaba, ha naqotee in Daraawiish gabayo badan loo soo mariyey. Cali jamac haabiil, ayaa gabay Daraawiish u soo mariyey halkudheggiisuna ahaa:- "Dameerka hariiryaha leh iyo heer dhulbahantaa leh" Sayid maxamedna alabkiisu wuxuu ahaa haddii gabay loo soo mariyo asuu doono inuu hadal ka celiyo inuu baro u dheereeyo. Gabaygaanna wuxuu ka tux raacaayey kii cali jamac.

Xuseenow ninkii hagar yaqaan waa habaar qabe e,
Ninna hagagi maayoo run baan,heeg u marayaaye,
Hadii aan hammiyey aakhiraan, laga habaabeyne.

Harti nimaan oqoon baa yiraa,hadalka qaarkiise,
Waa nimaan hurmuud wada ah iyo,hanadyo waaweyne.
Waa nimanka haybtoodu tahay, Haashinkaas kore e.

Waa nimanka deeqdii hanbaday, hibo Ilaaheeye,
Waa niman intay hodon yihiin, hoog ku sii daraye,
Waa niman gob baa lagu hirtaa, lagu hagaagaaye.

Waa nimanka daaraha hurdiyo, harac dallaal weyne,
Waa niman xariira huwanoo, huga ku laafyoone
Waa nimanka haashaarka gole,marada haafeeyne

Waa nimanka doonyuhu Hindiga,uga himbaartaane
Waa niman haruur iyo bariis,hoyga loo dhigaye
Waa nimanka haanfuuqayee,timirtu hoos taale

Waa niman haleeliyo horweyn,heel ka buuxsadaye
Waa niman adduun lagu huroo,maal hareeriminne
Waa niman intay wada habceen, heeshiguun dhiciye

Waa niman hingaar lama watee,haybad guursada e
Waa niman hablaha ay qabaan,halalac leeyaane,
Sida heegadoo curatay bay, shuqul hillaacaane

Waa niman hub iyo dowladnimo,haysta waligoode
Waa niman u heenseyn fardaa,halabsigoodiiye
Waa niman halqooqaha rogaal,heegma weligoode

Waa niman hadday rag is-hayaan,huriya baaruude
Waa niman madaafiic higliyo,haaliggii ridiye
Waa niman hanaanaca kufriga,hoor ka soo qubiye
Daaroodku waa wada halyey,kalase heyb roone

Dadka kalena waa wada hulqiyo,huuba doora lehe
Waxse heerle haad ferenji iyo, harabka Iidoore
Kuwa fuudka heeminahayoo,himishku duulaayo
Aan tan iyo Haabiil dheryaha.lagula hawshoonnin

Iyana heer inay leeyihiin,hubantidey weeye
Hiliblaha dukaaminahayoo,horori ceeriinka
Oo dhiigga soo hililiqlayn, haysha ka caseeyey.
Iyana heer inay leeyihiin,hubantidey weeye

Nimanka hablaha soorta guri, ku hargawaaxaayey
Ee tii wax hoomey tiraa,kula haliilaayey
Iyana heer inay leeyihiin,hubantiday weeye.

Nimankii hawaaree sidii,habas u kowdiidey.
Oo aan futada haawineyn, hogobka aad mooddo
Iyana heer inay leeyihiin, hubantiday weeye

Nimankii sidii awr hayina, hilayga qaadaayey
Hinjigiyo culayskii kuwuu,hoolay dhabarkooda
Iyana heer inay leyihiin hubantiday weeye.

Ragga hiirta waa beri dillaal, halaladuu roori
Oo aan hunguriga maalimeed,soo har gelihaynin
Iyana heer inay leyihiin, hubantiday weeye.

Nimankii habeedley ummula, huga u mayraayey.
Nimankii habeen iyo dharaar, hiribka qooshaayey
Iyana heer inay leeyihiin, hubantiday weeye.

Ragga udaha horsanahayoo,saxaraduu heegan,
Iyo nimanka hooyadood ku odhan, habartu waa dhuustey
Iyana heer inay leeyihiin, hubantiday weeye.

Axmed nuuxa nirig haaruuf badan,kabar u heereeyey
Ee hilinka meeshiyo Hiraab, habaqluhuu qaaday,
Iyana heer inay leeyihiin, hubantiday weeye.

Muusacarraha haragga iyo, hoorka xiranayaa.
Oo qurunka ay huursadeen, lagu hunqaacaayo
Iyana heer inay leeyihiin, hubantiday weeye.

Ciisaha baqtiga hiigayoo, haadka qalanayaa,
Oo calaha habuurka badan, hagida meeraaya,
Iyana heer inay leeyihiin, hubantiday weeye.

Habaryonis iyo reer Jugliyo, habar magaadloo dhan
Iyo caliga hoosada berbera, huluqa jiidaa,
Iyana heer inay leeyihiin, hubantiday weeye.

Intii heer lahayd ma aan dhammayn. hebelladoodiiye
Hayska hoobbiyeen nimanka aan, heray boqontiiye
Inta aan hunduudaa ka badan, hiishka geedaha e.

Niman baan bullaabee ma oran, hiijo iyo ceebe,
Waxsaan hubinayaa waa inay, hadiyad keenaane,
Ha yeeshee intaasaan hojee, hor Allahay geystay.

By: Ahmed H Aden <Shaxda Buuhoodle> (Shaxda.com)