Gabaygii: Jiinleey
-----------------------------------------------------------------
Gabaygan wuxuu ahaa Cabasho ama calaacal uu Sayidku kaga jawaabay ballan fur kaga yimid Boqor Cismaan. Waxaa la wariyey in Sayidku ergo u dirsaday boqor Cismaan oo majeerteenia xukumi jirey. Wuxuuna weydiistay in uu u soo guuro xaggooda, taas oo ay ku kalliftay in waqooyi, galbeed iyo koofurba colaadi kaga timid, gaar ahaanna Ingiriiska, Xabashi iyo Talyaanni. Boqorkii waa aqbalay baa la yiri, asagoo ergadii faray soo guura, oo saddex waxyaalood oo barigu leeyahay ugu soo guura: Sida Buuro dagaalka looga gabbado, Biyo maatada iyo xooluhu kuugu noolaadaan, iyo Bad, hub iyo xoolo laga helo.

Hase yeeshee markii daraawiishtii u soo guurtay xaggii bariga, oo geedi dheer oo hawlkar iyo oon badan ay ugu hayaameen, waxaa arrintii ka war helay Ingirriskii iyo Talyaanigii, kadibna waxay uga digeen inuu soo dhaweysto daraawiish, haddii kalena ay dagaal asagana ku qaadi doonaan, magaalooyinka laga gubi doono, baddana aan waxba uga soo degi doonin.
Markkii xujadaasi u timid boqorkii waxay dani ku kaliftay inuu Sayidkii ku ballan furo, isla markaasna inta uu col ka hor geeyey bay yiraadeen ordoo naga noqda. Daraawiishi kadid waxay u leexdeen xagga hawdka iyo Eyl, dagaalna waa dhex maray. Sayidkii asagoo arrintaas ka hadlaya wxuuu yiri asagoo ku hal qabsaday ninkii gabayada xafidi jirey ee la oran Xuseen Faarax( Xuseen Dhiqle):

Xuseenow jigraar lama hadlee jaalkay baa tahaye,
Adaan iga jadeer wicin markuu Jaahilkii didaye,
Jaanhooy adaan qaban markuu jiitay gacalkaaye.

Ragga gaalo jeefaafi waa ehel jaxiimaade,
Jahannama inay gelahayaan waygu jaamaca e,
Adaa jamalka soo raray markay janan u guureene.

Junne weeye ruuxaan ahayn jaadka aad tahaye,
Dadkii kale ka jeestaye adaan jaari kuu ahaye,
Waxaan kaa jarreeraynayaa sanadan jiilaale.

Sagal jiidan caad jilicsaniyo jarar hillaacaaya.
Onkod jow leh daad soo jirmaday jahada oo xiintay,
Jowjowlihii xalay sidii jibin u guuxaayey,

Jirka da'ay jallaysaha gugii hara jidhaamowday,
Jidhimada afkaa marahayiyo jababka ceegaaga,
Jaqaqarida geedaha noqdiyo xamashka oo jiiqle,

Sidii jaawo dhane loo shubaan jeelka ka bi'ine,
Waxaan kugu jalbeebinahayaa jowhartii gabaye,
Jawiskayga maqal caawa waan jalalabaayaaye.

Jundigii xigaaliyo anoo jooga gurigayga,
Anigaan jareexiyo xumaan juuq la ii oranin,
Anigaan rag ii soo jirfaday jil iga qaadaynin.

Anigoo jalaalada dhigtoo diinta jibanaaya,
Anigoo jameecada galoo jaarrun xaruntayda,
Anigoo wixii aan jantaba jimic la siiyo.

Jamradii adduunyada anoo jimicnimow haysta,
Karuur jagagaclayniyo anoo jaanka fuudahaya,
Anigaan jarraysimo hunguri la iga jeeqaaqin,

Jaanjaani baa iga khatalay johoraddaydiiye,
Hawo nimaan ka jigan baan ahoo jiiro dheer koriye,
Waxaan ahay nimaan jare aqoon sida jaguug awre.

Jawaabtii Majeerteen kolkay jalawdii ii yeedhay,
Inaan joro ku sii dhaho hadday igaga jeebnaatay,
Jiidaha Ilaahay haddii la igu jeeraarshey.

Xaga jiqa jaleefaniyo qurac, jinow wax heeraaya,
Jiqtoolaha galooliyo sarmaan jarafku xiimaayo,
Jimbac surad leh, jiiqo isku baxay, jiica iyo siiqda,

Jillab xanafle jowdheer qallalan, jabi xanuun weyn leh,
Jirma qodax leh, jiiqjiiq wax mudi jeerin iyo yooco,
Jirda badan jiroon iyo qaroon, jaaluf iyo seeri.

Jafka hawka guuraha waxaan jar iska xooraayey,
Wuxuu jeeni calafow libaax igu jibaadaayey,
Raadkaan ku jiillaa wuxuu daba jadeemaayey,

Jaldhaftiisa qoobka ah waxaan dib u jalleecaayey,
Jaajuurka geesaha waxaan jilayey ruuxayga,
Waxaan jaamagaarkii cabsida jimanka buuraayey,

Wiyil joof leh iyo yey waxaan jirif ku keynaanshey,
Jinni qabe shabeel ihi wuxuu igu jalaacaayey,
Juq waxaan u soo iri dugaag jalabutaynaaya.

Wixii gaade jimiq soola xuli juhunkii ii muuqday,
Jititaha hortayda ah waxaan jaaha kala leexday,
Wuxuu jiinka ii maray midgaan jilibka tooxaaya.

Kobaan jeesna ooliyo waxaan jarar ku aynfaaday,
Jawi lagu harraadiyo waxaan omos jibaaxaayey,
Jugleey igu dhawaaqdiyo wuxuu galowgu jiiqleeyey,

Jid abaara oo kulul waxaan hilin ku jiillaaday,
Juunaha xagaagii wuxuu jaaha iga leefay,
Jeedaaladii wuxuu indhaha jiitay aragoodu.

Jarmaadiyo carraababa waxaan bari u sii jeeday,
Xagla jalaqle laafyaha waxaan jagac ka siinaayey,
Jiitada masaafada waxaan jimiyey tooxeeda.

Jaldhiskayga saydhadu waxay jac iga siinaysey,
Jiriiricada ooga waxaan jararacoonaayey,
Cagta jeerarkeediyo waxaan boqonta jeedaashey,

Jalfiska iyo qonofkii waxaan jag isa siinaayey,
Jiljilladiyo seedaha waxaan jaa'ifo u geystey,
Jirridkii xabaallaa wuxuu jabiyey suulkayga,

Jirriqaa abeeriyo waxaan gocondho jeexaayey,
Janqaraara socodkii waxaan jaynaf macaluulay,
Jidaashaan u yeellaa wuxuu jiirku iga suumay,

Jilbis halaqa iyo good waxaan jaanta kala booday,
Wixii aan ku joogsaday abees jilifle oo duuban,
Maska jirirqleeyaa wuxuu jiiris igu dhaafay,

Jambareera dhicidii waxaan jiifka qaban waayey,
Hadba jimicsi iyo taah waxaan jilibka soo laabay,
Jidiindhowga qabatoon waxaan jiilka rogi waayey,

Waxaan jiidha waaberi kacoo jalafsadoo luuday,
Jarmaadada aroortii waxaan juhul madoobaaday,
Waxaan dhegaha jawgii ka baxay jibindhow moodaayey,

Wixii aan jajuub galay, waxaan jawray badankeyga,
Rabbi baygu jeefaye wxaan jululay ruuxayga,
Jaldhanka iyo baahida waxaan jalaqa heemaarshey,

Haddaan boqor jawaab iiga iman bad uma jeeleene,
Jeclaantaan u qabay baan jaankii badihiiye,
Jirku ima xanuuneen hadduu joog i leeyahaye,.

Jeer baa Ilaah ii qadaray jiirahaan maraye,
Jiidaha in meel loogu wado jaahil baan garane,
Waxse igu jirrabay waa ninkii jookha ii lulaye.

Cayuun jalalowlayn iyo raggaan jeer fardaha siiyey,
Jaamuus lo'aad iyo raggaan jimir aruu dhiibay,
Ammaan lacag jiriidaw furoo jeebka uga buuxshey,

Waxaan gool jinaad weyn qaloo joome uga gooyey,
Xeeryaha jiriidha leh waxaan jaari ugu qaaday,
Waxaan ramag jimiimici murkaha uga jufsiinaayey,

Waxaan ila xir jeexya leh aroos jalalmluu hooyey,
Jirjir malaba iyo foon waxaan jil uga yeelaayey,
Waxaan jaawiduu shiday intaan jalamaduu shaahshey,

Nimankaan jalbeebtooda gole jurux ka dhawraayey,
Inay jaxar abaal iiga dhigi laabtu jirin mayne,,
Jasadayda Eebbaan ka helin taloba waa jeere.

By: Ahmed H Aden <Shaxda Buuhoodle> (Shaxda.com