Xuseenow masalo waa halkii,maanka kaa dega e
Masala gaab wuxuu kugu ridaa, marin ciriiryoone
Meddad Eebbahay waa hadduu,marax ku siiyaaye

Cirku wuxuu muggaaba haddii,milaygi joogaaye
Malaf wuxuu baxaa waa dhulkoo,daadku ku hayaaba
Anna sida maqaarrey waxaan,mowda ku hayaaba.

Sidii maydab jiilaal waxaan, maanka ololaaba
Sidii aar wax mowtiyi waxaan,micida ruugaaba
Soomaali kale waxaan melgoo,madaxa gooyaaba .

Iidoor waxaan meeriyoo,malas u daadshaaba
Minka waxaan dayaafad u dhigoo,malab ku siiyaaba
Madadaalo been iyo cayaar,waxaan midigta saaraaba.

Maaweelo aan jirin waxaan,maandhe ku hayaaba
Waxaan maansa booli iyo jilib, ugu madiixaaba
Salaanaan milga lahayn waxaan,midigta saaraaba.

Wixii aan magoogaayey waa, miiska aan falaye
Makhrib dumay sidiisii xeryaa, ma u madoobeeyey
Ma makalay wax badan waanigii,maarruhuu sidaye .

Murti nimaan lahayn iyo gun waa, laga mildhaashaaye
Wax midgaana Deylkii martiyay,ma hurihiisiiye
Meertaysi nimankii u baxay,Eebbe naga meerye.

Durba murugadaan qabiyo,riday milaadkiiye
Meydkoodu waatuu ahaa,maadha oo kale e
Najiskaan mudmuday shalayto,waa maqaddinkoodiye.

Musannowga Caynaanshe waa,mahad Ilaahay e
Marsadii Berbera hawla kaco,maatadaan dhacaye
Malow iigu soo godol anay,maahugey tahaye .